Monday, March 1, 2021
Ngaran Utusan Daerah Pamilon Kongres Sunda, make Ngaran Prabu, Raja, Kandaga Lante atawa Jantaka?
Posted by
Tatarjabar.com on Monday, March 1, 2021
 |
| Avi Taufik Hidayat, nu utama bisa ngaraharjakeun masarakat |
Kaayaan urang Sunda kiwari aya dina posisi bertahan di satengahing gempuran globalisasi ti luar. Urang kudu mertahankeun basa, budaya, jeung sarakan katut lemah cai urang tina gempuran investasi nu keur lumangsung. Da lila-lila mah budaya katut rajakaya tanah Sunda teh bakal tumpur jeung koredas.
Kangaranan panitia Kongres Sunda, wajar lamun sagalana kudu “Nyunda”. Kapanan motekar, webinar make aplikasi zoom ge disebutna “Sawalamaya”. Kawasna kahareupna ge bakal dilengkepan saperti dina susunan pangurus, Ketua jadi Pupuhu, Sekretaris jadi Girangserat, Panitia jadi Panatacalagara, Bendahara : Panataharta, Pendiri : Panaratas, jsb.
Hal ieu wajar lamun nyoko kana kaayaan urang Sunda anu kiwari aya dina posisi bertahan di satengahing gempuran globalisasi ti luar. Urang kudu mertahankeun basa, budaya, jeung sarakan katut lemah cai urang tina gempuran investasi nu keur lumangsung. Da lila-lila mah rajakaya tanah Sunda teh bakal koredas. Kitu Cek Avi taufik Hidayat, Pupuhu Panitia Kongres Sunda.
Tah sawatara waktu nu kaliwat (12/2/2021), kalayan nyokot tempat di Pusat Digitalisasi BudayaSunda Unpad, Jalan Dipatiukur 46 Bandung, panitia Kongres Sunda geus madungdengkeun sual “Utusan Daerah”.
Utusan Daerah anu jadi salahsahiji pamilon Kongres teh rek dingaranan heuseus cenah ge. Aya nu usul dingaranan “Kandaga Lante”. Kandaga cek Danabrata, hartina kapala rayat anu ngagem pepeten nagara (pepetian/peti anu dieusi barang perhiasan/peti emas), ari Lante, Kapala sababaraha kandaga. Tapi aya anu ngahulag, wawakil ti Cianjur, beurat teuing cenah ge, pakait jeung 4 Kandaga Lante Pajajaran anu diutus raja masrahkeun Mahkuta Binokasih jeung pusaka lianna ka Sumedanglarang nalika Pajajaran burak (1579), coba we ngaran “Jantaka” (Kapala Pasukan). Da urang lembur mah ngan saukur ngalaksanakeun tugas ti puseur, saukur palaksana tugas.
 |
| Panatacalagara Kongres Sunda |
Cek Avi Taufik, memang di Subang geus aya nu make gelar anu luhur Prabu/Raja Galuh, nyaeta Evi Silviadi salaku Raja LAK (Lembaga Adat Karatwan) Galuh Pakuan Rahyang Mandalajati anu tangtuna leuwih luhur ti Kandaga Lante jeung sabenerna geus aya sababaraha inohong daerah anu make titel raja saperti di Sela Cau.
Sabenerna aya sababaraha tokoh anu make ngaran raja, tapi aya nu pada ngaku aya nu teu diaraku jadi weh teu laju. “Pami Kang Evi mah sejen deui, anjeunna mah salaku hiji pamingpin anu leres-leres berjuang pikeun rayatna, atuh teu helok lamun pada ngaku jadi raja/prabu teh. Malih tos remen ngayakeun kagiatan ageung anu sipatna internasional. Sakumaha nu pada uninga, Evi Silviadi kungsi kasinugrahan “Pala Emas” ti Presiden Jokowi lantaran naratas desa kawasan di Kacamatan Cijambe jeung Kacamatan Cibogo Kabupaten Subang. Sedengkeun anu lianna mah ngan ukur ngaku raja semet raksukanana bari jeung teu boga tarekah keur ngaraharjakeun rayatna,“ cek Avi tandes.
“Janten perkawis Utusan Daerah mah bebas bae lah, bade nganggo gelar, raja prabu, kandaga lante atawa jantaka ge, da anu utamina mah anjeunna mampuh jadi pamangku masarakat adat di daerahna sewang-sewangan, tiasa ngaraharjakeun masarakatna. Sareng ulah kawas 'Sunda Empire', anu ngalilieur sarea tea,“ timpah Avi bari seuri.
Ditalek iraha lumangsungna Kongres Sunda, nya jigana mah model KONI ngadadago PON jeung Olimpade we nungguan rengse sasalad Covid-19. Tapi Avi miharep dunya normal deui dina bulan November atawa Desember taun ieu. Kabeneran dina bulan-bulan eta pakait jeung kajadian-kajadian bersejarah pikeun urang Sunda jeung Nusantara, saperti Hari Djuanda (Ir. H. Djuanda Kartawijaya) anu ngadadasaranan Hari Nusantara (13 Desember), Kongres Pamuda Sunda (4-7 Desember) Sumpah Pamuda (28 Oktober), Hari Pahlawan (10 November). “Nya mugia we sasalad Corona enggal musnah sareng pamarentah ngarojong Kongres Sunda,“ kitu cek Avie anu harita dibaturan ku Andri Perkasa Kantaprawira, Panitia SC Kongres Sunda. (Asep GP)***
Subscribe to:
Post Comments
(
Atom
)
No comments :
Post a Comment