Home » Seni Budaya » Sawala Nonoman Sunda: Sikep Kaum Milenial Kana Kongres Sunda 2020

Saturday, January 18, 2020

Dina poe Kemis ping 16 Januari 2020 geus lumangsung Sawala Nonoman Sunda di Grha Soeria Atmadja Jl. Dipatiukur No. 46 Bandung.

Andri KP (baju bodas), Iip D. Yahya (tengah), Kang Wawan, keur nerangkeun Kongres Sunda ka kaum milenial

Kagiatan nu mangrupa rengrengan tina pra Kongres Sunda 2020 ieu diiluan ku organisasi pamuda jeung mahasiswa Sunda, hadir oge harita Andri Kantaprawira (Panitia Steering Committee) jeung Avi Taufik Hidayat Ketua Panitia OC (Organizing Committee), Kang Wawan, Wakil Lembaga Adat Trah Kunci Iman (Kuningan – Cirebon – Indramayu – Majalengka), jeung Iip D. Yahya. Sawala Nonoman ieu ngaguar 3 agenda Kongres Sunda: (1). Adeg-adeg sareng Tangtungan Sunda Mental set supados generasi Nonoman unggul (2). Sunda, Sarakan jeung Nagara (3). Malikeun Ngaran Provinsi jadi Provinsi Tatar Sunda, Sunda, atawa Pasundan.

“Tina 3 (Tilu) bahasan eta anu leuwih narik kanggo kuring mah materi 2 jeung nomer 3, Tata Wilayah, Sunda, Sarakan & Nagara, sareng Ngagentos ngaran Provinsi Jawa Barat ku ngaran Provinsi Tatar Sunda, Sunda atawa Pasundan”, kitu cek Asep Mandala Setiabudhi Wakil Pupuhu Kelompok Sunda Kiwari, Padepokan Pusaka Lembur Kabuyutan Situs Bumi Alit, Lebak Wangi Jalan Arjasari Banjaran, Kabupaten Bandung.

Cek Asep, lamun rek diganti ku ngaran Sunda, kasang tukangna kudu jelas sarta motivasi naon anu ngajurung urang hayang ngaganti ngaran. Lantaran lamun urang teu apal kana sajarahna bakal aya pacrogregan, papaseaan lantaran Jabar kiwari geus dimekarkeun (Provinsi Banten).

Hiji-hijina lengkah mah cenah kudu balik deui kana sistem “Kabuyutan". Jadi Samemeh aya kongres alusna mah kudu aya sawala di unggal Kampung Adat/Kasepuhan nu aya di Jawa Barat (kabuyutan) anu ngaguar pasualan tadi anu dipakaitkeun jeung sajarah kabuyutan sewang-sewangan. ”Janten ieu teu cekap dibahas ku teori wungkul kedah ngalibatkeun jalmi-jalmi anu aya di eta kabuyutan”, kitu pokna teh.

Asep ge salaku wawakil ti kaum Sunda Kiwari miharep kaum milenial, para nonoman kudu ngajaga jeung ngariksa budaya lemburna sewang-sewangan. Nu deukeut we heula cenah di wewengkon sorangan imeutan potensi daerahna naon kaunggulanana jeung kakuranganana boh Sumber Daya Manusa atawa Sumber Daya Alamna anu sakirana bisa dikali jeung dimekarkeun. “Pami tos manunggal SDM sareng SDA na tinangtos bakal ngahasilkeun pribadi-pribadi anu moal marakayangan.”, kitu saurna.

Asep, Budak Satepak, Kongres Sunda kudu ngalibetkeun urang Kabuyutan

Hal ieu cek Asep, aya pakaitna jeung ngamumule seni budaya. Lantaran dina unggal laku anu dipilampah ku Ki Sunda karuhun geus ngajarkeun teu sagawayah milampah, teu sabrongbrong pok torolong, laku Sunda mah mipit kudu amit ngala kudu menta, aya tatacarana. Upamana dina hal tatanen, dina saacanna der melak jeng dina panen teh aya ritualna/upacarana anu ngandung palsapah-palsapah luhung tur ilmiah guareun para nonoman, kaum milenial. Kitu cek Asep Mandala Setiabudi anu kawentar sok disarebut Kang BS atawa Budak Satepak

Rencana ayana Kongres Sunda 2020 ieu ge meunang apresiasi ti Dita Aditia Husen ti wawakil ti Badan Pangurus Puseur Ikatan Mahasiswa (IMA) Angkatan Muda Siliwangi (AMS). Ngan wae aya sababaraha hal anu kudu dibeberes cenah ge. Harepan Dita dina Kongres Sunda 2020 bakal rempeg diiluan ku para nonoman, kaum milenial anu dirojong ku para sepuh katut sakumna komponen masarakat sangkan bisa jadi wawakil anu nyoarakeun saniskara pasualan anu karandapan ku Ki Sunda salila ieu utamana dina hal pendidikan nu ngawanohkeun kana sistem kabudayaan jeung stratehi sangkan Ki Sunda kahareupna bisa mere kontribusi ka bangsa jeung nagara, lingkungan jeung semesta.

Dita ge brukbrak ka wartawan, salaku kaum milenial, ieu alumni Sastra Inggris FIB Unpad (2008 - 2015) teh miharep kapamingpinan Sunda kudu ditekenkeun kana silih asih-asih-asuh anu lain ngan saukur slogan, tapi kudu saperti tatanan kasiliwangian anu universal anu kudu dipropagandakeun salaku tatanan niley nu anyar anu bisa ngigelan jeung ngigelkeun zaman.

Dita IMA AMS, Ki Sunda kudu bisa mere kontribusi ka bangsa jeung nagarana

Kiwari cek Dita geus waktuna para nonoman mropagandakeun deui kaluhungan Ki Sunda. “Sunda mah teu kedah dibela da teu lemah, tos luhung, namung kedah dipropagandakeun deui sangkan urang Sunda nguniang harudang deui. Utamina mah kaum Milenial kedah ngamumule budayana sareng tiasa ngigelan zaman”, kitu pokna.

Urang Sunda ge kudu bisa mere sumbangsih/kontribusi ka nagara, carana nya dimimitian ku ngabeberes diri pribadi wae jeung lingkungan sabudeureun ti dinya bakal jadi spiral nganasional. “Pami tos lulus tata salira tangtos bakal tiasa maparin kontribusi ka tata nagara”, kitu cek mahasiswa semester ahir Pascasarjana Ilmu Politik, Fisip Unpad (2017).

Lian ti eta, lamun urang Sunda geus jadi pamingpin di ieu nagara. Ulah mawa Sunda dina harti nu heureut sacara etnis/teritori sabab Sunda mah tatanan ajen-inajen nu universal nu dipake ku sakumna bangsa, rek di Padang, di Medan kum sanusantara anu asalna ge kapan Dipantara nepi ka wewengkon Srilangka.

Kitu deui pikeun Fawaj Haris Pratama ti wawakil Aliansi Mahasiswa Jawa Barat, Departemen Seni Budaya dan Pariwisata, ngarasa reueus ku ayana Kongres Sunda anu rek digelar bulan Februari 2020, lantaran aya rohangan antara sepuh jeung nonoman anu hasilna bisa dijadikeun conto hade ku para nonoman/kaum milenial. Tapi aya nu dipikahariwang cenah ge sok sieun Kongres Sunda dibawa kana wilayah kakawasaan jeung politik. Lantaran keur Fawaj, Sunda mah jalan hirup, adab-adab tata-titi, sopan- santun dina ngabina hubungan jeung sasama.

Fawaj Haris, Kongres Sunda ulah dibawa kana politik jeung kakawasaan

“Abdi miharep ulah dugi ka Kongres Sunda dikerdilkeun ku kapamingpinan sareng dicandak kana wilayah perpolitikan nasional margi lamun ngaguar Sunda mah lega amabahanana teu kawatesanana ku wates teritori. Upami Sunda salaku wates wewengkon kanggo sim kuring mah sanes mangrupi jawaban kanggo merjuangkeun Sunda margi Sunda mah jalan hirup warisan ti karuhun”, kitu pokna tandes.

Sawala Pra Kongres Sunda

Sakumaha nu pada uninga dina bulan Februari 2020 ieu geus santer bakal aya Kongres Sunda di Gedong Merdeka Bandung. Tapi saacanna der geus lumangsung sababaraha kagiatan pra kongres nu digelar ku Panata Calagara (panitia), diantarana: Sawala jeung Para Sesepuh sarta Sunior Gerakan Kasundaan (Paguyuban Pasundan, 11 Oktober 2019); Sawala jeung Para Pakar Bidang Disiplin Kaelmuan (Kantor Hukum Dindin Maolani & Rekan, Kemis 24 Oktober 2019); Sawala Jawara (Lobby Theater Tertutup Taman Budaya Jawa Barat, Dago, Jumaah, 13 Desember 2019) nu kolaborasi jeung IPSI Jabar sarta ngalibetkeun para sesepuh, inohong, jeung paguron-paguron silat legendaris nu aya diTatar Sunda, kayaning Cikalong, Cimande, Syahbandar, Sera, Panglipur, jeung sajabana, nyawalakeun “Adeg-adeg jeung Tangtungan Sunda” atawa ngarumuskeun Bushido Sunda nu digali tina spiritual penca, keur ngageuing urang Sunda yen salila ieu boga tangtungan jeung adeg-adeg nu linuhung warisan karuhun, urang Sunda dipiharep nguning hudang ngarasa sababad jeung seler bangsa lianna, wani ngalengkah nyieun kahadean sarta mere sumbangsih pikeun bangsa jeung Nagara.

Sawala Nonoman Sunda, Sikep kaum milenial kana Kongres Sunda

Saterusna panitia ge geus ngumpulkeun para wawakil Menak/Bangsawan sa-Tatar Sunda dina acara “Sawala Kawargian” nu lumangsung di Grha Soeria Atmadja (Pusat Digitalisasi & Pengembangan Budaya Sunda Unpad), Minggu (22/12/2019), Jl.Dipatiukur No. 46 Bandung.

Dina hal ieu para bangsawan ti 8 Kawargian sa-Tatar Sunda, seperti Dr. Iwa Kuswaeri Ketua Rukun Wargi Sumedang (RWS), Sukapura (Rudi Wirahadikusumah), Kabupaten Bandung-Batulayang (Rd. Doddi), Bogor (Rd. Arya Wijayakusumah), Galuh (Ruyat Sudradjat), Wakil Lembaga Adat Trah Kunci Iman (Kuningan-Cirebon – Indramayu- Majalengka), Kang Wawan, Limbangan – Timbanganten (Raden Dina Akhmad), geus medalkeun KASAPUKAN MENAK SUNDA, anu unina: 1. Menak Sunda sapuk ngahiji dina hiji beungkeutan pikeun nanjeurkeun Sunda Sawawa Sunda Jaya Salalawasna 2. Menak Sunda sapuk pikeun mulangkeun ngaran Provinsi Jawa Barat jadi Provinsi Sunda atawa Pasundan 3. Menak Sunda sadia ngawangun Manusa Sunda anu unggul pikeun karaharjaan bangsa.

Saterusna dina poe Saptu (28/12/2019), di rohangan Parahyangan-Hotel Horison, Jalan Pelajar Pejuang 45 No. 121 Kota Bandung. Lumangsung Kagiatan repleksi ahir taun, “Mulangkeun deui Ngaran Provinsi Sunda/Pasundan”. Kagiatan kasundaan anu meunang rojongan gede ti Kang M. Nadjib ieu diluuhan ku para inohong/tokoh, seniman, budayawan, politisi, pergerakan kaum buruh, pergerakan wanoja, diantarana Acil Bimbo, Ganjar Kurnia, Indra Perwira, Ceu Popong, R.A. Ikke Dewi Sartika, Etti RS, Evie Ariadne, Ayi Hambali, Ki Iwan Natapradja, Mayjen Tatang Zaenudin (Purn), H. Yusyus Kuswandana, Ruyat Sudrajat, Iwa Kuswaeri, Dang Fathurahman, Aceng Ahmad Nasir, Hermana HMT, Nana Munajat, Neneng Nenih, Dina Ahmad, Man Jasad, Kadamas, jeung rea-rea deui.

Ganjar Kurnia nu jadi Pangjejer dina sesi hiji bareng jeung Indra Perwira, ngancokeun ngaran “Provinsi Tatar Sunda” keur gaganti Provinsi Jawa Barat anu dirojong ku Ceu Popong, Ki Iwan Natapradja, Jenderal Tatang Zaenudin, Man Jasad, jeung rea-rea deui. Tah nya saterusna ngayakeun Sawala Nonoman Sunda di Grhada Soeria Atmadja tea (16/1/2020). (Asep GP)***

Tatarjabar.com January 18, 2020 CB Blogger Indonesia